રાજકોટ મનપાની સામાન્ય સભામાં કોંગ્રેસના ગાયત્રીબા વાઘેલા સહિત 5 કોર્પોર્ટર સાઈકલ લઈ પહોંચ્યા

રક્ષિત પંડ્યા, રાજકોટ: રાજકોટ મનપાની સામાન્ય સભામાં આજે હોબાળો જોવા મળ્યો. સામાન્ય સભા પ્રમુખસ્વામી આર્કેડ હોલ ખાતે થઈ હતી. જેમાં પેટ્રોલ ડીઝલના ભાવવધારાનો વિરોધ વ્યક્ત કરવા માટે કોંગ્રેસના કોર્પોરેટરો સાયકલ લઈને પહોંચ્યા હતાં. પ્રદેશ મહિલા કોંગ્રેસના પ્રમુખ ગાયત્રીબા વાઘેલા સહિત 5 કોર્પોરેટર સાઈકલ લઈને પહોંચ્યાં હતાં. 

જો કે આ સભામાં લોકોના પ્રશ્નો તો બાજુ પર રહ્યાં અને શાસકો અને વિપક્ષના કોર્પોરેટરો આમના સામને આવીને એકબીજા પર આક્ષેપો કરતા જોવા મળ્યાં. કોંગ્રેસના કોર્પોરેટરો ઈંધણના વધતા ભાવ સામે વિરોધ વ્યક્ત કરવા માટે સાઈકલ લઈને પહોંચ્યા હતાં. 

વધુ વિગતો માટે જુઓ VIDEO

પેટ્રોલ ડીઝલના ભાવવધારાના વિરોધમાં કોંગ્રેસ કાર્યકરો ઘોડે ચડ્યા
સતત વધતા જતા પેટ્રોલ ડીઝલના ભાવને લઈને જ્યારે કોંગ્રેસે દેશવ્યાપી વિરોધ પ્રદર્શનો હાથ ધર્યા છે ત્યારે રાજકોટમાં પણ કોંગ્રેસ દ્વારા શહેરના પેલેસ રોડ પર વિરોધ વ્યક્ત કરવામાં આવ્યો. અહીં પણ ઘોડા ફેરવીને કોંગ્રેસે વિરોધ જતાવ્યો. જો કે કોંગ્રેસની આ રેલી માટે પોલીસે મંજૂરી આપેલી નથી. આથી કોંગ્રેસે વિરોધ કરતા પોલીસ દ્વારા અનેક કાર્યકરોની અટકાયત કરવામાં આવી. અનેક કાર્યકરોને ટીંગાટોળી કરીને લઈ જવાયા.

મળતી માહિતી મુજબ પેટ્રોલ ડીઝલના વધેલા ભાવો સામે આજે રાજ્યમાં પણ ઠેરઠેર કોંગ્રેસ દ્વારા વિરોધ પ્રદર્શન જોવા મળી રહ્યા છે. રાજકોટમાં કોંગ્રેસ કાર્યકરોએ ઘોડા ફેરવ્યાં અને તમામ 18 વોર્ડમાં વિરોધ પ્રદર્શન કરાયું. પોલીસે 50 જેટલા કાર્યકરો અને નેતાઓની અટકાયત કરી. આ દરમિયાન અનેક કાર્યકરોને ટીંગાટોળી કરીને લઈ જતા જોવા મળ્યાં.